pàgina domo

S'Ufìtziu de sa Limba Sarda

Dae su mese de ghennàrgiu de su 2007 at abertu in Barùmini s’Ufìtziu de sa Limba Sarda, gràtzias a s’Amministratzione Comunale chi at aplicadu sa lege natzionale 482/99, chi tutelat is minorias linguìsticas. Tocat a si regordare chi su Sardu est limba de minoria sa prus faeddada in Itàlia.

Cun custu Ufìtziu su Comunu de Barùmini bolet promòvere totu is fainas chi potzant portare a càstiu in onni manera sa limba e sa cultura Sarda, pro permìtere a sa gente de impreare su Sardu in sa vida de onni die, cando tenet a ite fàghere cun is Istitutziones puru.

Est a castiare a s’Ufìtziu comente a una aina pro fàghere a cumprèndere chi sa limba Sarda est unu bene chi agiudat a crèschere in sa sotziedade e in s’economia.

S’ULS de Barùmini at seberadu de impreare in custu giassu sa Limba Sarda Comuna: nois semus de acordu cun s'idea de manigiare totus sa pròpia limba. Una limba chi siat ufitziale e chi nos fatzat cumprèndere totus a pari. Aici feti sa Sardigna at a pòdere crèschere, e mancari arrennèschere puru a otènnere cussa rapresentàntzia in Europa chi semus currende de tempus meda.

Su chi bolimus comente SARDOS est sa co-ufitzialidade de su sardu cun s’italianu in Sardigna.

Atividades de s’ULS

- Promotzione de is leges chi difendent is limbas de minoria (Lege 26/97 de sa Regione, Lege natzionale 482/99);
- Realizatzione de progetos finantziados dae sa Lege 482/99 e dae sa Lege Regionale 26/97;
- Agiudu a is iscolas e a is sòtzios pro defèndere e promòvere sa Limba e sa Cultura Sarda;
- Realizatzione de paperis de novas pro sa gente;
- Tradutzione de sa modulìstica e de sa documentatzione prodùsida dae s’Amministratzione Comunale;
- Tutela e atividade de chirca subra de sa traditzione literària e linguìstica de Barùmini.

A s’Ufìtziu depent bènnere totu is chi bolent consultare libros, ditzionàrios e giornales, pregontare novas de sa Limba e de sa Cultura Sarda, dimandare de is leges chi tutelant is minorias linguìsticas istòricas e de is progetos finantziados dae is Leges 482/99 e 26/96.

In s’Ufìtziu agiudamus puru a iscrìere in sardu, in grafia campidanesa e in Limba Sarda Comuna

Su sardu, chistiona-ddu semper!